Шрифт

2 декабря

Канон преподобному Варлааму, игумену Печерскому.

Преподобному Варлааму, игумену Печерскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Ми́ра кра́сная и сла́ву его́ оста́вль, прите́кл еси́ в пеще́ру, иде́же от си́лы преуспева́я в си́лу, бы́л еси́ во́ждь Христо́ва ста́да, всесла́вне Варлаа́ме, е́же я́ко упа́с до́бре, упаси́ и на́с, мо́лим тя́, сохраня́я от все́х зо́л, да тя́ ублажа́ем.

Кано́н преподо́бному, гла́с 1.

Пе́снь 1.

Ирмо́с: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Припев: Преподобне отче Варлааме, моли Бога о нас.

Лю́тою рабо́тою печа́лей ми́ра сего́ мно́гих, блаже́нне, ви́дя плене́нных, размы́слил еси́, я́ко не́сть от тоя́ избавля́яй, ра́зве а́ще кто́ Изба́вителя Христа́ стопа́м после́дует, те́мже Оному неле́ностен бы́л еси́ ревни́тель. Бо́дрою у́бо твое́ю моли́твою, о́тче, и мене́, уны́лаго, к похвале́нию твои́х по́двигов до́бре подви́гни, да ско́ро воспою́ пе́снь Бо́гу, я́ко просла́вися.

Припев: Преподобне отче Варлааме, моли Бога о нас.

Напое́н бы́в слове́с медото́чных от вели́каго отца́, не возжела́л еси́ про́чее зре́ти вспя́ть, но, за́дняя забы́в, на пре́дняя, а́ки перна́т, устреми́лся еси́, еди́но мы́сля, е́же взыска́ти все́м се́рдцем Бо́га и вы́ну пе́ти Ему́ пе́снь, я́ко просла́вися.

Припев: Преподобне отче Варлааме, моли Бога о нас.

От бесе́ды преподо́бнаго Анто́ния те́плою к Бо́гу любо́вию, а́ки пла́менем, се́рдцу твоему́ распали́вшуся, блаже́нне, ра́достен, а́ки не́кое обре́т сокро́вище, в до́м сво́й возврати́лся еси́, предложе́ние же во́ли твоея́ при но́гу достоблаже́ннаго отца́ оста́вил еси́, пото́м к нему́ па́ки прите́к, вы́ну воспева́л еси́ Бо́гу, я́ко просла́вися.

Сла́ва Отцу́ и Сы́ну и Свято́му Ду́ху:

Вели́каго Анто́ния бесе́де богодухнове́нной внима́я, запина́ющия миролю́бия се́ти расто́ргл еси́ и, прите́к к нему́, бы́л еси́ уче́ния того́ при́сный слы́шатель, поя́ ку́пно с ни́м Бо́гу, я́ко просла́вися.

И ны́не и при́сно и во ве́ки веко́в. Ами́нь.

Богоро́дичен: Стужа́ющия ми́ вы́ну напа́сти и прило́ги вра́жия разжени́ предста́тельством Твои́м, Чи́стая Де́во, и не посрами́ мене́ от ча́яния ми́лости Твоея́: еди́на бо еси́ с Сы́ном Твои́м наде́жда ненаде́ждным.

Пе́снь 3.

Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́.

Припев: Преподобне отче Варлааме, моли Бога о нас.

Ка́мень небрего́мый, Христе́, Ты́ бы́л еси́ во главу́ у́гла, и на Тебе́ преподо́бный Тво́й, хотя́ до́м душе́вный созда́ти, предразсуди́ смире́ния, нищеты́ и про́чиих доброде́телей сте́ны положи́ти, те́мже, прише́д к вели́кому отцу́, моли́ его́, глаго́ля: на ка́мени за́поведей Госпо́дних утверди́ мя́, преподо́бне.

Припев: Преподобне отче Варлааме, моли Бога о нас.

В сла́ве и бога́тстве со мно́гими о́троки прише́д к пеще́ре святе́й, пове́ргл еси́ под но́зе ста́рцу вся́ кра́сныя у́твари и себе́ сама́го, вку́пе низлага́я и лука́ваго горды́ню.

Припев: Преподобне отче Варлааме, моли Бога о нас.

Разуме́в, свя́те, я́ко сокро́вище у́мное сокрове́нно е́сть в пеще́ре святе́й, все́ принесе́нное тобо́ю бога́тство и себе́ сама́го прода́л еси́ Анто́нию и, я́ко доброразу́мный купе́ц, купи́л еси́ село́ то́, на не́мже обогати́лся еси́ си́м, и́мже тя́ и по сме́рти прославля́ем.

Сла́ва Отцу́ и Сы́ну и Свято́му Ду́ху:

Ве́ка сего́ бога́тство, сла́ву и суету́ вся́ку, се́ни скоропреходя́щей подо́бна бы́ти, проразсуди́л еси́, преподо́бне. Те́мже, вся́ в уме́ты вменя́я, да Христа́ Еди́наго приобря́щеши, возлюби́л еси́ ше́ствовати к Нему́ и́ночествующих стезе́ю.

И ны́не и при́сно и во ве́ки веко́в. Ами́нь.

Богоро́дичен: Пу́ть живота́ моего́, беззако́нными страстьми́ олядене́вший, десни́цею, Чи́стая, е́юже Де́лателя Вы́шняго носи́ла еси́, отреби́ и очи́сти, да и во мне́ стезя́ доброде́телей яви́тся, и ду́х пра́в обнови́тся во утро́бе мое́й.

Седа́лен, гла́с 8:

Твое́ жела́ние неотло́жно вели́кий во отце́х ви́дев, возложи́ на тя́ шле́м спасе́ния, обле́к тя́ в броня́ пра́вды, причте́ к и́ноческому полку́, ты́ же — во́ин, в Ца́рство небе́сное учине́н, до́бре подвиза́лся еси́ на ви́димыя и неви́димыя враги́, и́мже одоле́в, прия́л еси́ вене́ц небе́сныя по́чести, ю́же улучи́ти моли́, преподо́бне Варлаа́ме, и на́м, чту́щим любо́вию святу́ю па́мять твою́.

Сла́ва, и ны́не, Богоро́дичен:

На борю́щияся со мно́ю враги́ да́ждь по́мощь свы́ше, Богоневе́стная Де́во, и научи́ мя, я́ко ве́дущая и́х хи́тростныя ко́зни, сия́ одолева́ти: никто́же бо и́х победи́т, а́ще не Ты́ пособи́ши изря́днее чту́щим любо́вию Пренепоро́чное Рождество́ Твое́.

Пе́снь 4.

Ирмо́с: Слы́ша дре́вле Авваку́м, Христе́, чу́дный Тво́й слу́х и стра́хом взыва́ше: от ю́га Бо́г прии́дет и Святы́й от горы́ приосене́нныя ча́щи спасти́ пома́занныя. Сла́ва си́ле Твое́й, Го́споди.

Припев: Преподобне отче Варлааме, моли Бога о нас.

Слы́шавше три́ во́инствующии супоста́ты, я́ко обнажи́шася любве́ твоея́, егда́ обле́клся еси́ в ри́зу спасе́ния, возскорбе́ша на тя́ и, яря́щася, воздвиго́ша на тя́ отца́ твоего́, ты́ же положи́л еси́ се́рдце твое́ в си́ле Госпо́дни.

Припев: Преподобне отче Варлааме, моли Бога о нас.

Притече́ на ста́до свято́е неразу́мный оте́́ц со мно́гими о́троки к пеще́ре и, разгна́в все́х, извлече́ тебе́, тепле́йшею любо́вию к Бо́гу привя́заннаго, на Него́же наде́яся, взыва́л еси́: сла́ва си́ле Твое́й, Го́споди.

Припев: Преподобне отче Варлааме, моли Бога о нас.

Извле́к тя́, блаже́нне, во́н оте́ц тво́й, совлече́ святу́ю ма́нтию и вве́рже в де́брь, та́кожде и шле́м спасе́ния, и́же бе́ на главе́ твое́й, сне́м, заве́рже, та́же облече́ во оде́жду све́тлу и многоце́нну. Ты́ же, вся́ сия́ презре́в, Ангельскому житию́ неукло́нно поревнова́л еси́, взыва́я и вопия́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Ну́ждею оде́ян в пресве́тлую оде́жду, попра́л еси́ ту́ в ка́л, вку́пе с не́ю попира́я го́рдаго врага́, льстя́щаго разли́чными су́етствы приближа́ющихся пе́ти: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Студо́м беззако́ний лю́тых покрове́нна мя́ совлецы́, Богоро́дице, и оскверне́нную ри́зу мою́, подаю́щи ми́ покая́ние и умиле́ние, благода́тию Твое́ю чи́сту сотвори́, да благода́рно предста́ну Ти́, зовы́й: ра́дуйся, оде́ждо наги́х дерзнове́ния, Влады́чице.

Пе́снь 5

Ирмо́с: Све́т Тво́й незаходи́мый возсия́й, Христе́, в сердца́ ве́рно пою́щих Тя́, ми́р подава́яй на́м па́че ума́; те́м, от но́щи неве́дения ко дню́ све́том Твои́м теку́ще, славосло́вим Тя́, Человеколю́бче.

Припев: Преподобне отче Варлааме, моли Бога о нас.

Ну́ждею ведо́му ти́ в до́м в све́тлых ри́зах, блаже́нне, све́т Бо́жий незаходи́мый облиста́ се́рдце твое́, те́м не воззре́л еси́ на све́т ле́стный, но, Бо́га еди́наго предзря́ одесну́ю себе́, Того́ славосло́вил еси́ я́ко Человеколю́бца.

Припев: Преподобне отче Варлааме, моли Бога о нас.

Послу́шав Влады́ку, на безсме́ртный обе́д зову́щаго, преподо́бне, оте́ческия трапе́зы не вкуси́л еси́, но, очи́ма до́лу зря́, у́м возводи́л еси́ к высоте́, размышля́я трапе́зу небе́снаго Царя́ и блаже́нство сего́, и́же сне́сть обе́д в Ца́рствии небе́сном.

Припев: Преподобне отче Варлааме, моли Бога о нас.

Кра́сную пала́ту творя́ в се́рдце свое́м Пресвято́му Ду́ху, не се́л еси́ на сла́вном ме́сте в пала́те твое́й, но в угле́ еди́ном, изволя́я те́сное житию́ ме́сто избра́ти к славосло́вию Го́спода Человеколю́бца.

Сла́ва Отцу́ и Сы́ну и Свято́му Ду́ху:

Не уклони́л еси́ се́рдца в словеса́ лука́вая обру́чницы твоея́, ни возше́л еси́ на ло́же ея́, внима́я рече́нным: во сла́ве преподо́бнии возра́дуются на ло́жах свои́х, и́хже ны́не еси́ прича́стник и насле́дник.

И ны́не и при́сно и во ве́ки веко́в. Ами́нь.

Богоро́дичен: На ло́жи злы́х лежа́ща мя́ воздви́гни, Богоро́дице, и Твои́м руководи́тельством напра́ви живо́т мо́й, е́же бы про́чее вре́мя покая́нием проводи́ти и славосло́вити Тя́, Благоутро́бнаго Христа́ Бо́га на́шего Ма́терь.

Пе́снь 6.

Ирмо́с: Ве́сь от страсте́й безме́рных содержу́ся и ки́том зо́л снизпадо́х, но возведи́ из нетле́ния мя́, Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния и спасе́ния ду́хом пожру́ Ти.

Припев: Преподобне отче Варлааме, моли Бога о нас.

Ве́сь напа́стными искуше́нии окружа́емь, к Человеколю́бцу взыва́л еси́, преподо́бне, е́же изба́вити тя́ от се́ти ловя́щих, и пребы́л еси́ три́ дни́ а́лчен, моли́твою то́кмо ду́шу пита́я и глаго́ля с проро́ком: от тли́ сея́ возведи́ мя́, Бо́же, и а́з про́чая ле́та и́стинным ду́хом поживу́ Тебе́.

Припев: Преподобне отче Варлааме, моли Бога о нас.

О тебе́, блаже́нне, в толи́ком искуше́нии су́щу, моли́тва бе́ приле́жна от святы́х, су́щих в пеще́ре, воззва́ша бо пра́веднии, и Госпо́дь услы́ша и́х и тя́ изба́ви от печа́ли, преклони́в се́рдце отца́ твоего́ на ми́лость, и́же сожале́ о терпе́нии твое́м и, любе́зно тя́ целова́в, отпусти́ с ми́ром в святу́ю пеще́ру.

Припев: Преподобне отче Варлааме, моли Бога о нас.

Гла́с плаче́вен тогда́ слы́шашеся в дому́ отца́ твоего́: роди́тели пла́кахуся по тебе́, люби́мом сы́не, жена́ лю́те рыда́ше тебе́, обру́чника своего́, раби́ и рабы́ни стеня́ху с во́плем по господи́не, и провожда́ху тя́ вси́ со слеза́ми; ты́ же, ра́достен изше́д, а́ки от Еги́пта во обетова́нную зе́млю, свя́те, благодаре́ние прине́сл еси́ Бо́гу, я́ко изба́ви тя́ от лю́таго мироде́ржца.

Сла́ва Отцу́ и Сы́ну и Свято́му Ду́ху:

Сла́ва Тебе́, Бо́гу Еди́ному, во Тро́ице Святе́й сла́вимому, я́ко спа́сл еси́ раба́ Твоего́ от треплете́ннаго супоста́та, от его́же спаси́ и на́с моли́твами Твоего́ уго́дника, почита́ющих его́ па́мять.

И ны́не и при́сно и во ве́ки веко́в. Ами́нь.

Богоро́дичен: Спаси́, Влады́чице, страстьми́ погруже́нных и простри́ ру́ку отча́янным, я́ко да, спа́сшеся Тобо́ю, и́стинным ду́хом хвале́ние принесе́м Тебе́ с Единоро́дным Твои́м Сы́ном и Бо́гом.

Конда́к, гла́с 2:

Оте́ческаго преще́ния не устраши́лся еси́, ласка́ниям того́ не повину́лся еси́, ниже́ ле́стию низложи́лся еси́ же́нскою, всече́стне Варлаа́ме, но непобеди́мь от те́х пребы́л еси́, наде́яся на Го́спода своего́, Ему́же моли́ся о душа́х на́ших.

Икос:

Самоизво́льное твое́ ви́дя страда́ние, кто́ не удиви́тся, преблаже́нне Варлаа́ме? Обличи́л бо еси́ де́монския ко́зни и, по́хотным страсте́м до́блественно сопротивоста́в, ко́ль мно́го от напа́сти пострада́л еси́, да чи́сту ду́шу твою́ предста́виши Бо́гови, Ему́же и о на́с моли́ся приле́жно, свя́те, да изба́вимся от я́рости плотски́х и неви́димых враго́в поспешеству́ющими твои́ми к Бо́гу моли́твами о душа́х на́ших.

Пе́снь 7.

Ирмо́с: Проидо́ша, я́ко черто́г, пе́щный пла́мень нестерпи́мый, и́же за благоче́стие иногда́ о́троцы святи́и, показа́вшеся я́ве, и, согла́сно воспева́юще, пе́снь поя́ху: отце́в Бо́же, благослове́н еси́.

Припев: Преподобне отче Варлааме, моли Бога о нас.

Проше́л еси́, преподо́бне, искуше́ния пла́мень и, не опали́м пребы́в от него́, врага́ па́че опали́л еси́, неви́димо борю́щагося с тобо́ю, на́нь же посо́бствоваху тебе́ наста́вника твоего́ моли́твы, то́й бо непреста́нно зва́ше: отце́в Бо́же, благослове́н еси́.

Припев: Преподобне отче Варлааме, моли Бога о нас.

Почуди́ся Анто́ний терпеливоду́шию твоему́, я́ко с лю́тым велиа́ром боря́ся, не устраши́лся еси́ многоплете́нных его́ ко́зней, и́миже а́ще и запя́т бы́л еси́, но терпе́нием и смире́нием победи́л еси́ и о́троческую воспе́л еси́ пе́снь: отце́в Бо́же, благослове́н еси́.

Припев: Преподобне отче Варлааме, моли Бога о нас.

Возвра́щшуся тебе́ с побе́дою ко отце́м в пеще́ру, ра́дости вси́ испо́лнишася, я́ко ви́деша тя́, венцено́сца, возра́довася же и ста́рец тво́й, прие́мый тя́ здра́ва, те́мже и воспе́ша: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Ви́дев Анто́ний, я́ко на ко́рени уче́ний его́ доброде́тельми возра́сл еси́, а́ки доброцвету́щее дре́во, преподо́бне, и ле́торасль ю́ности твоея́ ста́рческия благода́ти принесе́ плоды́, чуди́ся и благода́рственне взыва́ше: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Гнию́щее греха́ми дре́во живота́ моего́ окропи́ от благода́ти Твоея́ росо́ю, Де́во Чи́стая, я́ко да поне́ ма́лыя возрасту́т ве́тви и принесу́ Ти кра́сен, безсме́ртен смире́ния и моли́твы пло́д, зовы́й: ра́дуйся, плода́ безсме́ртнаго стяжа́ние.

Пе́снь 8.

Ирмо́с: Чу́да преесте́ственнаго показа́ о́браз огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки.

Припев: Преподобне отче Варлааме, моли Бога о нас.

Чу́до! я́ко дарова́ние еще́ в ю́ности твое́й нача́ де́йствовати, е́же ви́дев, Анто́ний вождя́ тя́ в себе́ ме́сто поста́вил бра́тии, и бы́л еси́ до́бр па́стырь отце́м, пою́щим и превознося́щим Го́спода во ве́ки.

Припев: Преподобне отче Варлааме, моли Бога о нас.

Прие́мь нача́ло правле́ния, прия́л еси́ вно́вь нача́ло и житию́ твоему́, свя́те, и́бо приложи́л еси́ труды́ ко трудо́м и по́двиги во бде́нии сугу́бо, я́ко все́м име́ти тя́ во о́браз, хотя́щим пе́ти Го́спода во ве́ки.

Припев: Преподобне отче Варлааме, моли Бога о нас.

До́бр наста́вник и оте́ц бы́л еси́, блаже́нне: я́коже бо са́м никогда́же не измени́л еси́ пра́вила твоего́, та́ко и бра́тию нака́зовал и моли́л еси́ име́ти тща́ние о спасе́нии и прилежа́ти о души́, ве́щи безсме́ртней, а́ще хо́щут со Ангелы превозноси́ти Го́спода во ве́ки.

Сла́ва Отцу́ и Сы́ну и Свято́му Ду́ху:

Мы́сленнаго ища́ Иерусали́ма, стра́нствовал еси́ к чу́вственному, вся́кия труды́ в пути́ Христа́ ра́ди сла́дце терпя́; Его́же жизнопода́тельный Гро́б любе́зно целова́в, возврати́лся еси́, пою́щи Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Всепе́тая Ма́ти, небе́сных чино́в Госпоже́, небеси́ и земли́ Цари́це, от земны́х мя́ отврати́ и да́ждь го́рняя иска́ти, сподо́би же в го́рнем Иерусали́ме Тебе́ пе́ти и превозноси́ти Го́спода во ве́ки.

Песнь 9

Ирмо́с: Неизглаго́ланное Де́вы та́инство: не́бо бо Сия́, и престо́л Херуви́мский, и светоно́сный черто́г показа́ся Христа́ Бо́га Вседержи́теля. Сию́ благоче́стно я́ко Богоро́дицу велича́ем.

Припев: Преподобне отче Варлааме, моли Бога о нас.

Неизглаго́ланныя ра́дости наслажда́ешися, о́тче, ны́не: со Ангельскими бо чи́ны предстои́ши Невече́рнему Све́ту и на́с в све́те за́поведей Госпо́дних ходи́ти упра́ви моли́твами твои́ми.

Припев: Преподобне отче Варлааме, моли Бога о нас.

От жи́зни сея́ к ве́чному животу́ пресели́лся еси́, преподо́бне, и прия́л еси́ упокое́ния ме́сто. Жи́знь у́бо на́шу, обурева́ему наведе́нии сопроти́вных, невре́дну сохрани́ и ра́йскаго селе́ния да́ждь доспе́ти твои́м направле́нием.

Припев: Преподобне отче Варлааме, моли Бога о нас.

Возвраща́яся от Константи́на гра́да, отше́л еси́ душе́ю во всесветя́щийся гра́д Царя́ Небе́снаго, мо́щи же своя́ оста́вил в монастыре́ Святы́я горы́, я́же запове́дал еси́ пренести́ в пеще́ру, иде́же ны́не лежа́т нетле́нны, точа́щия исто́чник чуде́с приснотеку́щий.

Сла́ва Отцу́ и Сы́ну и Свято́му Ду́ху:

Прославля́яйся во святы́х Свои́х, Еди́ный Бо́же, просла́ви все́х ве́рных, покланя́ющихся Твое́й великоле́пней сла́ве: се́ бо приво́дим Тебе́ в моли́тву уго́дника Твоего́, его́же ра́ди спаси́ все́х на́с.

И ны́не и при́сно и во ве́ки веко́в. Ами́нь.

Богоро́дичен: Славосло́вим Тя́, Де́во, немо́лчными усты́ и ублажа́ем по до́лгу; Ты́ бо Еди́на блаже́нная в жена́х еси́, ро́ждши Отчее Единоро́дное Сло́во, с Ни́мже Тя́ ку́пно, ве́рнии, велича́ем.

Свети́лен:

Сла́дким любве́ Христо́вы жела́нием уязви́в ду́шу твою́, преподо́бне, и тоя́ вы́ну насыща́тися хотя́щи, ми́ра тле́ннаго с по́хотьми отре́клся еси́, до́м и роди́тели оста́вил еси́, о обру́чнице твое́й небре́гл еси́; сего́ ра́ди стори́цею прия́л еси́ и живо́т ве́чный насле́дуеши, его́же и мы́ да не лиши́мся, да́ждь по́мощь твои́ми моли́твами.

Молитва

О, свяще́нная главо́, преподо́бне о́тче, преблаже́нне а́вво Варлаа́ме! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же сам упа́сл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас недосто́йных у престо́ла Вседержи́телева, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и мо́щи твоя́ сокрове́ны бы́ша на земли́, но свята́я твоя́ душа́ со А́нгельскими во́инствы, со Безпло́тными ли́ки, с Небе́сными Си́лами, у Престо́ла Вседержи́телева предстоя́щи, досто́йно весели́тся. Ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя муки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние, со безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Варлааму, игумену Печерскому